नेपाल मजदुर किसान पार्टीका नेता साथै प्रतिनिधि सभा सदस्य प्रेम सुवालले सरकारी जग्गा व्यक्तिको नाममा दर्ता गर्न भूमिका खेल्नेहरुलाई कारवाही गर्न माग गर्नुभएको छ ।

प्रतिनिधि सभाको बुधबारको वैठकमा बोल्दै भक्तपुर क्षेत्र नम्बर एकबाट निर्वाचित संघीय सांसद सुवालले यस्तो माग गरेका हुन् ।

वैठकमा बोल्दै सांसद सुवालले भक्तपुरको हनुमन्ते नदीको २०–२५ रोपनी जग्गा हाल साबिक गराई व्यक्तिको नाममा दर्ता गराउने तत्कालीन भूमिव्यवस्था मन्त्री, सांसद र सरकारी अधिकारीहरुलाई कारवाही गर्न माग गरे ।

२१ सालको नापीनक्सा बिपरित, भक्तपुरको मध्यपुर र सुर्यविनायकको सिमानामा हनुमन्ते नदीको बहाव परिवर्तन गराई नदीको २०–२५ रोपनी जग्गासमेत हाल साबिक गराई ब्यक्तिको नाममा दर्ता गराइएको दावी सांसद सुवालले गरे ।

ब्यक्तिको नाममा दर्ता गरिएको सो जग्गा पुनः सरकारी बनाउन सांसद सुवालले माग गरे ।

साथमा काठमाडौंको ठमेलस्थित बौद्ध बिहारको सरकारी कमलपोखरी र वरिपरीको सरकारी जग्गा व्यक्तिको नाममा दर्ता गराउने मन्त्री र सरकारी अधिकारीहरुलाई कारवाही गर्न पनि उनले माग गरे ।

‘काठमाडौ ठमेलस्थित बौद्ध बिहारको सरकारी कमलपोखरी र वरिपरीको सरकारी जग्गासमेत ३०–३५ रोपनी ब्यक्तिको नाममा दर्ता गरी व्यापारिक भवन बनाउन लगाउने सम्बन्धित मन्त्री र सरकारी अधिकारीहरुलाई कडा कारवाही गरी सो क्षेत्र पुन सरकारी स्वामित्वमा ल्याउन जारुरी छ’ सुवालको भनाई हो ।

सुवालले अमेरीकी नीतिको पनि नेपाल सरकारले विरोध र भत्सर्ना गर्नुपर्ने विचार राखे ।

चीनले रुससँग युक्रेनमा शान्ति कायम गर्ने विषयमा १२ बुँदाको प्रस्ताव राखेको र त्यसपछि अमेरिकाले चीनको भूमि ताइवानमा पृथकताबादी गतिविधि गर्न लगाएको दावी गर्दै सुवालले अमेरिकी नीतीको बिरोध एवं भत्सर्ना गर्न जरुरी रहेको बताए ।

अमेरिका र फिलिपिन्सको संयुक्त सैन्य अभ्यासको पनि सरकारले बिरोध गर्न जरुरी रहेको सुवालको भनाई हो ।